قالوا اتكلموا عن الأحلام عشان لو بطلنا نحلم نموت .
لكني ميت يمشي على قدمين
كل اللي كنت بحلم بيه إني ارجع زي زمان يقيني بالله يقيني
معدش عندي أحلام .. لما قريت انكم عايزين تدونوا عن الأحلام افتكرت انكم عايزين تكتبوا عن المنامات عشان أنا بحيى فيها هي ديه الحياة الوحيدة المتحركة عندي لكن الأحلام بمعنى الأمنيات والأهداف والطموحات :) لم أعد أعرف معاني لتلك الكلمات فكيف أكتب عنها ؟
قد تخليت عن احلامي منذ زمن بعيد وكتبت عن ذلك .
فيما مضى كنت أكتب قائمة أحلامي ولا أحقق منها شئ ليس لأنها مستحيلة .. ولكنها لا تتحقق قد يكون لعجزي وضعف ارادتي في تحقيقها .. قد يكون عدم توفيق من الله لم يعد يهمني السبب النتيجة واحدة ليست هناك أحلام تتحقق . على الأقل لي . فأنا ميت يمشي على قدمين .
حتى لو كتبت عن المنامات :) مناماتي كلها كوابيس ومكررة من ٢٠ سنة لا تتغير ... ماشية حافية بقع من فوق بمشي في اماكن مهدودة دايما تايهة راكبة عربية حد بكرهه سايقها ... حتى المنامات ما فيهاش حاجة تفرح ابدا
أكتب ليه وعن ايه ؟
الانسان يكتب عشان غيره يستفيد يخلي غيره يضحك او يفرح او ياخد معلومة تفيده او يحكي عن تجربة حياتية ... اللي عنده حاجة يحكيها ... انا حياتي مافيهاش حاجة احكيها . آخر حدث هام تخرجي من سنين بعد عناء من كلية الشعب . نقطة ومعدش فيه سطر بعدها . يبقى أكتب ااقول ايه .. رحاب بتقول فضفضي ... حستفاد ايه ؟ واللي يقري بس حيعرف عني حاجات وهو انسان غريب يعرف عني ليه ؟ يبقى مفيش داع للكتابة من أصله
حتى القراية مش عايزة ااقري
كل اللي فاكراه زمان كنت بحلم كتير خلصت على كل الاحلام .. جت على بالي دلوقتي اغنية لمدحت صالح
بحلم على قدي .. بشراع يعديني .. بشموع تدفيني .. بعيون تصون ودي
كل اللي بتمناه بس وبحلم بيه ارجع أاقرى قرآن أرجع للإيمان اللي فقدته من شدة الحزن والاكتئاب خلاص مش عايزة اعرف ناس ولا عايزة اي حاجة من دنيا أنا ميتة فيها .. مش عايزة شغل ولا جواز ولا عيال ولا البس ولا آكل بس عايزة ارجع تاني اآمن .. وأحس بالرضا .. محدش يقول كلام تطييب خاطر محدش يقول انت أحسن من غيرك وشوفي الفقرا والمعاقين والناس الشقيانة .. احيانا حد عنده كل مشاكل الدنيا وراضي صدقني بيكون أحسن منك يالي ممكن تكون كل مشاكلك موبايل وعربية .. نعمة الرضا قصاد كل نعم الدنيا كفاية .. ممكن انسان كفيف تلاقيه مرتاح البال وسعيد وممكن مبصر عنده كل الدنيا تحت رجليه وحزين وبائس .. اللي معرفش يعني ايه اكتئاب يحمد ربنا .. حتى ربنا قال ونجيناه من الغم ..
عرفتوا ليه مبكتبش لأن كتابتي مافيهاش فايدة للناس بالعكس ممكن تضرهم .. عرفتوا ليه مبقراش اللي بتكتبوه لأنكم أحياء وأنا :) زومبي ... كل اللي بتقولوه بالنسبة لي ضرب من الخيال والوهم .
لو بطلنا نحلم نموت ... خلاص يبقى نموت ونموت ونموت ونموت .
ما علينا محدش ياخد باله من الكلام مالهوش اي لازمة .
