1) الأولة بلدي

بسم الله الرحمن الرحيم 

أنا عارفة النهاردة ٥ /٧ .. معلش أن تأتي أخيرا خير من ألا تأتي .. أحداث البلاد تسدل  جو من الاكتئاب الشديد على والذي احاربه ويحاربني منذ سنوات التخرج من الجامعة من أول قصة حب فاشلة من سنة تالتة جامعة . من وقتها بحارب الاكتئاب قدر استطاعتي والدنيا مش مدياني فرصة ااقدر اهزمه عمرها ما ضحكت في وشي وربنا موفقنيش لا في شغل كويس ولا انسان ااقدر اعيش معاه . 

عشان كده اعتبر نفسي كتلة اكتئاب متحركة وعشان كده بنصح اللي يجي المدونة ديه عن طريق الخطأ والصدفة يسامحني لأنه أكيد حيطلع مكتئب منها وأكيد مش ده اللي انا بتمناه لحد أبدا لأن اللي حس بالاكتئاب عارف انه اشد وطأة من أي مرض عضوي ممكن يصيب الانسان . انت ممكن تعرف انسان معاق فاقد احد حواسه ومع ذلك بيضحك وراضي عن حاله . المكتئب حاله اصعب  كتير حتى لو سليم وعنده من نعم ربنا لكن مش حاسس بحاجة غير الحزن .. رجاء متلومهوش وتقول أصله ميعرفش ربنا .. قول ربنا يعافيه .. ده ربنا قال ونجيناه من الغم يعني الغم ده حاجة كبيرة قوي قوي ممكن تولد الكفر ممكن تولد الامراض ممكن تخليك كاره حياتك كلها . عشان كده اذا كنت سليم معافى من الاكتئاب قول الحمد لله الذي عافانا وابعد عن المكتئب لأنه مرض معدي :) يعني بطل تقرالي وسيبني اهلفط لوحدي هنا عايز تقرالي ابقى زورني في المدونة الرئيسية هناك حتلاقيني افضل شوية او في مدونة البنات مع صديقاتي سارة وسلوى ..... أيوة احنا ٣ سين . 

طول عمري بعمل كل حاجة متأخر خالتي كانت بتقولي انت من عباد آخر ليلة وماما بتقول اني دايما مش ملتزمة لدرجة اني مرة رحت امتحان الجبر ثانوية عامة انا واصحابي الساعة ٩.وربع :) متقلقوش ٣ اترموا في تجارة الشعب وواحدة فلتت على طب الحمد لله . عمري ما بروح مكان بدري ابدا حتى القطر في السفر دايما انط فيه وهو ماشي عادي يعني في مصر المنحوسة مفيش حاجة مستعجلة حتى لو رحت لدكتور ودفعت مستعجل برضه قدامك ساعتين تلاتة 

ليه باجي متأخرة لأني معنديش أمل في أي حاجة أيوة يائسة أيوة ايماني مات  مش بقولك متلومنيش ولا تنصحنيش ولا حتى تدعيلي الحاجات ديه انا زهقت منها ٢٠ سنة مبتجبش نتيجة خلاص 

ليه بكتب ؟ لأني مش لاقية حاجة تانية اعملها 

ليه مبحاولش ؟ لأني تعبت من المحاولات 

كفاية عليكم كده في اول تدوينة انا ححاول اعوض الايام اللي فاتت المهم اطلع ب ٣٦٥ تدوينة في مشروع ٣٠٠ و٦٥ يوم تدوين 

معكم من برج الاكتئاب العالي 

سماح الليالي